“Җиңү волонтерлары“ башлыгы Навальныйның хурлавы турында: Ул барлык ветераннарны да рәнҗетте

(10 июнь,“Апастово-информ“).

Татарстан буенча “Җиңү волонтерлары“ хәрәкәте башлыгы Азат Идрисов Бөек Ватан сугышы ветеранын яклап чыкты.

“Мин моңа бик тискәре карыйм. Чөнки, бу - бер ветеранны гына түгел, ә барлык ветераннарны да хөрмәт итмәү дигән сүз. Алар болай да бик аз калды. Безгә аларда булган барлык мәгълүматларны һәм белемне сакларга һәм киләчәк буыннарга да түкми-чәчми җиткерергә кирәк. Җиңү алып килгән батырларга без мәңгелек бурычлы, без аларны хөрмәтләргә һәм данларга тиеш“, - диде Идрисов.

Идрисов шулай ук, Алексей Навальныйның тәртибен килешмәгән эш дип саный. Һәм мондый җәберләүләргә юл куелырга тиеш түгеллеген ассызыклый. Үзен таныту максатыннан буш сүзләр сөйләп йөрмәскә киңәш итә.