Казан приютлары тавыш бирергә чакыра

(29 июнь, “Апастово-информ”)

Казан шәһәрендәге бер шәхси йорт капкасында гражданнарны тавыш бирергә чакырган плакат пәйда булды. “Хуҗасыз хайваннар асраучы приютларга акчалата ярдәм итә алмасагыз, һичьюгы, Россия Конституциясенә төзәтмәләр кертүдә катнашыгыз. Чөнки, анда хуҗасыз хайваннарны яклау гарантияләнә”, - дигән фикер ул плакатта. Плакатның фотосы социаль челтәрләрдә киң таралды.

Блогерлар Конституциянең 114нче маддәсенә тәкъдим ителгән төзәтмәләрне дә күрсәтәләр. Россия Федерациясе Хөкүмәте хайваннарга карата җаваплы караш формалаштыру буенча эш алып бара, дигән сүзләр турында фикер алышалар. Инде бүген үк, кайберәүләр, хайваннар өчен махсус дәүләт приютлары эшли башларга мөмкин, дигән фикерне әйтәләр. Чөнки, әлегә бу эш, нигездә, шәхси, битараф булмаган кешеләр акчасына башкарыла.