Кече Болгаер китапханәсе иң актив китап укучы өлкәннәрен җыйды

(1 октябрь, “Апастово-информ”).

“Бәйрәм кичәсендә катнашучыларның барысы да авыл хуҗалыгы тармагында эшләп чыккан кешеләр. Ә безнең өчен алар - китапханәбезне якын күрүче, иң актив китап укучылар. Өлкәннәребез хөрмәтенә оештырылган кичә бик җылы, истәлекле узды. Көзге муллык күргәзмәсенә нигезләнеп, “Бакча - ямь һәм тәм” темасына эчкерсез сөйләшеп утырдык. Өлкәннәребезнең барысы да җыр-моңга осталар, гармун көйләренә кушылып матур җырлар яңгыраттылар, яшьлекләрен искә алдылар. Бәйрәм белән котларга Болгаер бүлекчәсе идарәчесе Нияз Гайфуллин да килгән иде. Ул өлкәннәргә иң изге, ихлас теләкләрен җиткерде. Өлкәннәребез бәйрәм чарасыннан бик канәгать булып, кабат очрашулар язсын иде, дигән теләктә калдылар”, - дип хәбәр итә китапханә мөдире Гөлүсә Гайфуллина.