Кырда үткән хезмәт дәресе

Апас аграр көллияте студентлары, Дүртиле авылы егете Шәүкәт Вафин белән яшь апаслы Линар Идиятуллин быелгы язгы кыр эшләренә үз өлешләрен кертәләр.

-Класс-аудиторияләрдә алган теоретик белемнәребезне кырда, олы абыйлар белән бертигез эшләп ныгыту,  хезмәт күнекмәләре үтү безгә бик ошый,-диләр алар.

Дүртиле бүлекчәсе механизаторы Азат Зиннәтуллин булачак игенчеләрнең тырыш һәм бик җитез булуларын ассызыклый:

-Әнәле янәшәсендә солы чәчәбез. Басуга ашханәдән вакытында тәмле кайнар аш, ындырдан яхшылап әзерләнгән чәчүлек китерәләр, безнең агрегатка беркетелгән шофер Әсгать Закиров эш конвейерын бер дә өзми. Бүлекчә җитәкче-белгечләре дә яныбыздан китми, санаулы вакытның кадерен бик беләбез,-ди.