Районда “Авыл яши” проекты тормышка ашырыла

(2 март, “Апастово-информ”).

Очрашу Шыгай, Карамасар һәм Акхуҗа китапханәчеләре тарафыннан оештырылган. Биредә Карамасар һәм Шыгай авылларының тырыш кешеләре - фермерлар һәм шәхси ярдәмче хуҗалык җитәкчеләре яшьләр белән очрашып, эш тәҗрибәләре белән уртаклашкан, киңәшләрен җиткергәннәр. Әңгәмә интерактив аралашу форматында үткән.
“Очрашу яшьләргә киләчәккә планнарын, перспективаларын, максатларын билгеләргә этәргеч булды. Биредә катнашкан яшьләр авыл җирендә дә үз эшеңне булдырып, яшәү мөмкин булуы хакында кызыксынып тыңладылар”, - дип хәбәр иттеләр китапханәчеләр.
Районда “Авыл яши” республика проекты дәвам итә. Татарстан республикасы күләмендә тормышка ашырылучы мәгълүмати проект авылларны саклап калуга, яшәтүгә юнәлдерелгән.