Рәмис Ногманов: “Бик четерекле эш булса да, яшьләр бик тырыштылар

Апастово-информ, 24 март 2023 - 10:53

239

Апас туган якны өйрәнү музеенда аграр көллияте студентлары агачтан сувенирлар ясап карадылар.

(24 март, “Апастово-информ”).

Башта укучылар сәнгатьнең төрләре белән таныштылар. Аннары ярым эшләнелгән әзер агач материалларны көйдереп, рәсем ясап карадылар. Бик сокландыргыч эшләр килеп чыкты. Суыткычка ябыштырылып куела торган магнит исемнәр, догалар, кайнар таба астына кую тактасы, төрле туризм билгеләре, логотиплар, нәзәкатьле ручкалар – ни генә юк иде.

“Бик четерекле булса да, яшьләр бик тырыштылар. Барлык куркынычсызлык кагыйдәләре дә үтәлде. Агач материаллар бик матур сувенирларга әверелде. Яшьләр үз эшләренә бик сөенешеп, сувенирларын үзләре белән алып киттеләр. Кызыклы чараның дәвамлы булуын теләделәр, рәхмәтләрен белдерделәр”, - дип хәбәр итә Апас туган якны өйрәү музее директоры Рәмис Ногманов.