Шонгатыда яшәүче Елизавета Мелешина Ил башлыгының Котлау хатын алды

Ул үзенең уңганлыгы, булганлыгы, тынгысызлыгы белән аерылып тора. Дуслары да бик күп аның. Авылның олысы-кечесе хөрмәт итә үзен. 90 яшьлек гомер бәйрәмен дә дуслары янәшәсендә каршылады. Бу көнне аның өчен икеләтә бәйрәм булды. Ветераннарны тораклы итү программасы нигезендә район үзәгеннән алган фатирында өй туен да билгеләп үтте.
Елизавета Дмитриевнаны тәбрик итәргә район башкарма комитеты җитәкчесе урынбасары Луиза Сафина, Зур Күккүз авыл җирлеге башлыгы Рузия Низамова да килде. Юбилярга Ил башлыгының Котлау хаты, район башлыгының Котлау открыткасы, бүләк һәм чәчәк бәйләме тапшырылды.