Шонгаты егете ясаган ракеталар илебез тынычлыгы сагында

Апас "Туган төбәкне өйрәнү" музеена Удмуртиянең Воткинск шәһәреннән кыйммәтле бандероль килде. Якташыбыз, ике тапкыр Социалистик Хезмәт Герое дәрәҗәләренә ирешкән, 38 яшеннән зур хәрби, ракеталар җитештерүче заводны җитәкләгән, Шонгаты авылында туып-үскән Владимир Садовниковның бүгенге хезмәттәшләре Апаска "Трудовая вахта" завод газеталарын юллаганнар. Билгеле булганча, узган ел район үзәгендә Республика көнендә бу данлыклы якташыбызның бюсты завод коллективы делегациясе катнашында тантаналы итеп ачылды. Газеталарда бу кунакларыбызның кичерешләре турында бик җылы истәлекләр урын алган. Район башлыгы һәм бюстны ижат итүче үзешчән сынчы Вячеслав Носовка зур рәхмәтләрен җиткергәннәр. Музей архивында шулай ук заводның үткәне, бүгенгесе һәм Владимир Садовников турында берничә китап, истәлекле фотолар да бар.
Ришат Җамалиев.