Студент баласы булган апаслылар өчен

Карамагында төп белем бирү программасы буенча югары һәм урта һөнәри уку йортларында көндезге бүлектә укучы студент баласы булган пенсионерларның страховка пенсиясенә теркәлүче түләүләрне арттырырга хокуклары бар.
Апас районы Пенсия фонды бүлеге хәбәр иткәнчә, әлеге артулар ата-ананың икесенә дә кагыла. Тик аның өчен студент 23 яшьтән олы булмаска тиеш. Билгеләү өчен баланың туу турындагы таныклыгы кирәк. 18 яшьтән олы булган балаларга өстәмә белешмәлекләр сорала - аның укуы турында белешмә, стипендия суммасы турында белешмә, аның карамагында булуы турында белешмә. Әгәр инде студент уку йортыннан киткән икән, ул турыда пенсия фондына хәбәр итү шарт. Документлар биргәннән соң пенсияне яңадан исәпләү һәр айның беренче көнендә башкарыла.