Ташбака, күркә һәм ат - ниләр генә юк монда

Җәйге ялның бер көнендә укытучыбызның хәлен белергә барган идек. Безне зур гына бер эт каршы алды. Гадәттә чит кеше кергәч, этләр өрә торган була. Ә Мая (этнең кушаматы) бик акыллы эт булып чыкты. Бик зур булуына карамастан, без аны сыйпадык, аны кулыбыздагы конфет белән сыйладык. Аннан укытучыбыз безгә ташбакаларын, песиләрен, атларын, тавык-чебешләрен, күркәләрен күрсәтте. Без үзебезне зоопарктагы кебек хис иттек. Мин күркәне беренче тапкыр күрүем. Бигрәк кызык икән бит алар. Кызыл киемне яратмыйлар икән, очып күршеләренең бакчаларына да чыгарга мөмкиннәр икән. Кош-кортларны, хайваннарны яратырга кирәк, ди укытучыбыз. Киләсе язда әниемә әйтеп, күркәләр алдырырмын бәлки. Алар миңа бик ошады.

Гүзәл Гарифуллина, Биеш урта мәктәбе.