Татарстан башкаласында шәһәр тарихы турында сөйли торган автобуслар йөри башлый

Әлеге проект кысаларында татар һәм рус телләрендә шәһәр тарихы турында сөйли торган аудиогид ел азагына кадәр №2, №6, №90, №91 (өчешәр автобус) маршрутларының 12 автобусында яңгыраячак. Маршрутларны сайлау юлның озынлыгы һәм автобусның Казанның төрле өлешләрендә йөрүе белән бәйле.

Тулаем аудиогидны автобусларда урнаштырылган QR-код аша махсус ресурста тыңларга мөмкин булачак.

Аудиогид Казан турындагы легендалар, халыкның гореф-гадәтләре, вакыйгалар, истәлекле урыннар, кызыклы фактлар, күренекле шәхесләр, социаль инфраструктураның мөһим объектлары һәм мәдәният учреждениеләре турында аз билгеле булган мәгълүматны үз эченә ала.