Россия Почтасы MAX мессенджерында бизнес чат-бот эшләтеп җибәрде

"Россия Почтасы" кече һәм урта бизнес эшкуарлары өчен MAX мессенджерында махсус чат-бот эшләтә башлады. Яңа хезмәт почта белән бәйле төп сорауларны онлайн, бүлекләргә бармаслык итеп хәл итәргә мөмкинлек бирәчәк, дип хәбәр итә Почтаның матбугат хезмәте.

Чат-бот ярдәмендә кулланучылар хат яки посылка җибәрүне рәсмиләштерә, абонент тартмасына заказ бирә, курьер чакыра, электрон заказлы хатлар хезмәтен тоташтыра һәм почтадан җибәрелгән әйберләрнең статусын күзәтә ала.

"Россия Почтасы" генераль директоры урынбасары Дмитрий Чудинов билгеләп үткәнчә, компания клиентларның почта хезмәте белән үзара бәйләнешен уңайлырак һәм тизрәк итәргә омтыла. Аның сүзләренчә, яңа чат-бот эшкуарларга вакытны һәм ресурсларны сакларга, мөһим бурычларны тизрәк хәл итәргә һәм бизнесны үстерүгә игътибар итәргә ярдәм итә.

Моннан тыш, компания мессенджердагы хезмәт функцияләрен киңәйтү өстендә эшли. Журналларга һәм газеталарга корпоратив язылу мөмкинлеген, шулай ук максатчан реклама кампанияләрен башлау өчен инструментлар өстәргә планлаштырыла.

Элегрәк "Россия Почтасы" шәхси кулланучылар өчен охшаш чат-бот эшләткән иде. Аның ярдәмендә онлайн посылкалар җибәрергә, реаль вакытта доставканы күзәтеп барырга, курьер доставкасын рәсмиләштерергә һәм басмаларга язылырга мөмкин.