Борнаш авылы халык театры сәхнәләштергән өзек һәркемне уйланырга мәҗбүр итте

(6 декабрь, “Апастово-информ”).

Борнаш авылы халык театры әлеге чарада бөек шагыйрьнең “Минем беренче гомерем” китабы буенча театраль күренеш тәкъдим итте. Әлеге китапта аның ике туган апасы сөйләгәннәреннән чыгып язылган “Кеше әйберсенә тимә” дигән өлеш бар. Сәхнәләштерү өчен шул өзек сайлап алынган.
“Бу минем режиссер буларак беренче эшем. Миңа 7нче сыйныф укучысы Раил Ногманов һәм 4нче сыйныф укучысы Ислам Әхмәтҗанов булышты. Әлеге өзектә сугыш чоры тасвирлана. Бик уйландырырлык вакыйга сурәтләнә. Режиссер буларак беренче тәҗрибәм булса да, халык бик яратып кабул итте, югары бәяләде. Шундый зур кунаклар янында чыгыш ясавыбыз белән бик горурланабыз”, - дип сөенечен уртаклаша Борнаш халык театры режиссеры Фидания Мөхәммәтшина.