Капиталь төзекләндерүдән соң Карамасар авылы клубы ачылды

(3 январь, «Апастово-информ»)

Карамасар авылы клубы 1974 елда төзелгән. Шуннан бирле җиңелчә төзекләндерү эшләре генә күргән бина инде шактый искергән иде. Узган елны район җитәкчелеге ярдәме белән бинада күләмле төзекләндерү эшләре башланып китте. Ул илкүләм милли-мәдәни проектлар нигезендә башкарылды. Төзекләндерү эшләренә Федераль бюджеттан 20 миллион тирәсе акча бүлеп бирелгән.

Авыл клубы тулысы белән яңартылган. Бина эчке яктан да, тышкы яктан да төзекләнгән. Түбәсе яңадан ябылган, тышкы фасады матур итеп тышланган, җылыту системасы, электр челтәре яңартылган. Эчке диварлары матур төсләргә буялган. Тирә-юне дә төзекләнгән. Керү юлларына матур брусчатка да җәелгән. Ул 100 урынга исәпләнгән.

Капиталь төзекләндерүдән соң, бина тантаналы төстә үз ишекләрен ачты. Биредә авыл халкын җыр-моңнар белән каршы алдылар.