Кечкенә дә төш кенә

"Коштавылы фермасында елга якынча 900 баш мөгезле эре терлек симертелә, таналар үстерелә. Интенсив технологияләр кулланып, ай саен уртача 400 килограммлы 40 баш үгезне өлгертеп иткә озатабыз", - ди "Зөя" агрофирмасы баш зоотехнигы Айдар Сафиуллин.

Авыл бригадиры Алсу Ильясова менә ниләр сөйләде:

- 7-8 еллар элек фермалар бушап калган елларны искә төшерәсе дә килми хәзер. Бүген инде терлекләргә урын җитми. Ындыр табагы, машина-трактор паркының бер өлешен симертү мәйданчыгы итеп көйләргә туры килде. Терлекләргә ышыклану, иркенләп ашау, аслары коры булсын өчен бер ангарны 3 метр биеклектәге салам тюклары белән тышлау да ярап куйды. Җәйге матур айларда үгезләрнең тәүлеклек артымы 1 әр кг-га җитте. Нияз Гыйсмәтуллин белән Флера Вәлиева Роза Ситдыйкова хезмәтенә тел-теш тидерерлек түгел. Фермаларга тәмле, сыйфатлы терлек азыгы гына әзерләп китерүче, улакларга салучы шофер-механизаторлар, терлекчеләр Әмир Идрисов, Наил Ильясов, әтиле-уллы Рузалин һәм Ранис Газиевлар, Илфат Сәхәбиев, Рөстәм Сафин үз вазифаларына бик җаваплылар. Астагы төп фермада таналар караучы, яшь үгезләрне интенсив симертүгә әзерләүче абыйлы-энеле Илдус белән Илдар Насыйбуллиннар, Руслан Гайнуллин, Рамил Ибәтуллин да эшләрен бер дигән итеп башкаралар. Каравылчыларыбыз Рафик Хәкимов белән Фәрит Мөлеков та эш дигәндә янып-көя торганнардан.