Тутай авылы китапханәсендә сабырлык үрнәге күрсәтеп яшәүче хатын-кызлар кунак булган

(6 февраль, “Апастово-информ”).

Бәйрәм кичәсендә яшьли тол калып, авырлыкларга бирешмичә, тормыш сукмаклары буйлап сыңар канат белән юл ярып баручы, көчле рухлы, сабыр холыклы хатын-кызлар кунак булган.
Кичәгә гүзәл затларны тәбрикләргә авыл җирлеге башлыгы Наилә Насретдинова дә килгән.
“Сез - сабырлыгыгыз һәм тыйнаклыгыгыз белән һәркем өчен зур үрнәк. Сезгә киләчәктә дә исәнлектә-саулыкта, күңел төшенкелегенә бирешмичә, якыннарыгызның кадер-хөрмәтендә яшәргә насыйп булсын. Урыннарыгыз һәрвакытта да түрдә булып, һәр көнгә сөенеп гомер итәргә язсын, - дип теләде ул.
Бәйрәмгә килгән апалар чәй табыны артында яшьлекләрен искә алып, рәхәтләнеп аралашып утырганнар, җылы кичә оештыручыларга кат-кат рәхмәтләрен белдергәннәр.
Бу хакта авыл китапханә мөдире Гөлшат Нургалиева хәбәр итте.