Апаста “Балкыш” фестивале дәвам итә

(3 февраль, “Апастово-информ”).

Сайлап алу туры 2нче февраль көнне Урта Балтай мәдәният йортында узды. Биредә Урта Балтай, Олы Бакырчы, Чирмешән, Тутай авыл җирлекләреннән килгән үзешчәннәр катнашты. Өлкәннәр җыр, бию, нәфис сүз, инструменталь һәм вокал ансамбльләр номинацияләре буенча чыгыш ясады. 
“Шунысы сөенечле - карлы-буранлы көн булуга карамастан, өлкәннәр шактый җыелды. Нинди генә сәләт ияләре юк иде биредә… Иҗатка, сәнгатькә гашыйк ир-атларның күп булуы аеруча куандырды. Җырладылар да, шигырьләр дә сөйләделәр, төрле уен коралларында көйләр дә яңгыраттылар. Бер-берсе белән очрашып, рәхәтләнеп аралашу өчен дә зур мөмкинлек булды. Чарада шулай ук халык иҗаты күргәзмәләре дә оештырылды. Күңел җылысын салып эшләнгән кул эшләре дә сокландыргыч иде. Соңыннан һәр катнашучыга да Грамоталар тапшырдык”, - дип хәбәр итте район ветераннар Советы җитәкчесе Гөлнур Насыйбуллина.