Безнең районга күршеләрдән куркыныч яный!

-Бу бик куркыныч, йогышлы авыру. Аңа каршы көрәш, аны кисәтү чаралары бик чыгымлы,-ди районның баш мал табибы Марат Фәтрахманов.

-Кош гриппы йоктырган тавык-чебеш, каз-үрдәкнең тән температурасы кискен күтәрелә. Ул боегып кала, аз хәрәкәтләнә. Томшыгыннан туктаусыз селәгәй, төрле бүлендек килә. Ул калтырый, ашамый башлый, күпләп үлә. Гади өй кош-кортының уртача тән температурасын белеп торыгыз. Тавыкларда ул 40-42, үрдәкләрнеке 41-43, казларныкы 40-42 градус  булырга тиеш.

Күрше республикада кош гриппы таралу куркынычы саклана. Аның безнең районга да үтеп кермәвен тәэмин итү максатында тиешле ашыгыч кисәтү чаралары үткәрелә. Карантин игълан ителгән территориядән кош-корт сатып алу катгый тыела. Кош-корт, терлек азыгы сатып алуда да чикләүләр кертелә. Үз ихатагызда кош-кортны урамга, сулыкларга чыгармавыгыз хәерле. Кыргый үрдәк-казлар, кыр тавыклары белән контактка кермәүләрен ныклап күзәтегез. Сулыкларда үлгән, боеккан кыргый кошлар күрсәгез, күпләп үлүләре шаһиты булсагыз, кичекмәстән авыл җирлекләренә, участок һәм район мал табибларына мөрәҗәгать итегез!