Иске Әнәле балалар бакчасында Сабантуй бәйрәме узды

Сабантуй татар халкының иң яраткан бәйрәме дисәк тә була. Иске Әнәле балалар бакчасында да милли бәйрәмебез сабантуй оештырылды. Нәниләр төрле уеннар уйнап, җырлап-биеп бәйрәм иттеләр. Халкыбызның гореф-гадәтләрен чагылдырган Сабантуй бәйрәменең балалар өчен әһәмияте бик зур. Бәйрәмне балалар көтеп алдылар. Бәйрәмгә әзерлек эшләре ике-өч атна алдан ук башланды. Балалар төркемнәрдә Сабантуй турында җырлар өйрәнделәр. Тәрбиячеләр әңгәмәләр уздырды: бәйрәмне сурәтләгән рәсемнәр, презентацияләр күрсәттеләр, милли бизәкләр, милли уеннар белән таныштырдылар. Бәйрәмнең ачылу тантанасыннан соң уеннар башланды. Сабантуйда борынгыдан ук гадәткә кергән уеннар уйнатылды: кашыкка йомырка салып йөгерү, чүлмәк вату, аркан тарту, су ташу, капчык киеп йөгерү. Барлык уеннарда да балалар теләп катнаштылар, үз-үзләрен кыю тоттылар. Балалар Сабантуй бәйрәменнән бик канәгать калдылар. Барысына да бәйрәм бик ошады, җилкенеп-җилкенеп бәйрәм турында сөйләштеләр. Бәйрәм ахырында һәр балага бүләк таратылды.