Карабайда тату гаилә серләре турында сөйләштеләр

(30 гыйнвар, “Апастово-информ”). 
 

“Безнең Карабай авылында тату, матур гаиләләр бик күп. Ә 45 елдан артык бергә яшәп, бар кешегә дә үрнәк булу - үзе зур бәхет бит ул”, - ди кичәне оештыручы Наилә Гыйззәтуллина. 
Илдус абый һәм Роза апа Бариевлар шундый парларның берсе. Клубта алар белән очрашып, озак еллар тату гаилә булып яшәүнең серләрен белеп, аларны котлап, матур очрашу үткәрделәр. 
 
“Бер-берегезгә булган җылы хисләрегез алдагы көннәрегездә дә югалмасын, иңне-иңгә куеп, тату гомер кичергән кебек, алга таба да пар канатларыгыз каерылмасын, балалар игелеген күреп, оныклар хөрмәтен тоеп, озак еллар гомер кичерергә Ходай насыйп итсен Сезгә”, - дип теләкләрен дә җиткерде мәдәният хезмәткәрләре.