Сайлау участогына килә алмыйсың икән, өйгә киләләр

(15 март, “Апастово-информ”).

Сайлау комиссиясе вәкилләре олы яшьтәгеләрнең, инвалидларның өйләренә үзләре киләләр. Мондый мөмкинлек Багыш авылында да булды.
“88 яшьлек Рәхимулла абый Шакиров сайлау участогыннан ерак яши. Безгә ул алдан әйтеп, гариза язган иде. Шуңа күрә без аның өенә барып сайлаттык. Шулай ук Нурия апа Әхмәтгәрәева да сәламәтлеге аркасында сайлауга килә алмады. Аңа да кереп сайлатып чыктык. Рәхимулла абый белән Нурия апа икесе дә гомере буе Багышта яшәп, колхозда хезмәт иткән кешеләр. Үз тавышларын бирергә мөмкинлек тудырганнары өчен алар кат-кат рәхмәтләрен белдерделәр, илгә-көнгә тынычлык теләп озатып калдылар”, - дип хәбәр итә сайлау комиссиясе рәисе Эльвира Сибгатова.