“Балаларымны мили рухта тәрбиялим»

  Кызлары Радинә һәм Ясминәне тегәргә, чигәргә, бәйләргә өйрәтә ул. Бу гаиләне төрле чараларда, күргәзмәләрдә еш күрергә була. Аларның эшләнмәләре нәфислеге, йомшаклыгы белән сокландыра.
  -Мин үзем дә яшьтән үк тегәргә, чигәргә, бәйләргә яраттым. Кызларымны да милли рухта тәрбияләп, әлеге шөгыльләргә өйрәтәм. Кичләрен бергәләшеп кул эшләренә алынабыз, бик яратып бәйлибез, чигәбез, - ди Рамилә.
  Гаилә елын ябу тантанасына да алар бик теләп катнаштылар һәм үз эшләнмәләрен күргәзмәдә тәкъдим иттеләр. Җылы оекбашлар, бияләйләр, чиккән сөлгеләр, яулыклар, мендәр тышлары - һәрберсенә күңел җылысы кушылган, түземлек, тырышлык салынган.
  -Сарык җебеннән дә, кибет җебеннән дә бәйлибез. Шулай ук кулдан да, тегү машинасы белән дә чигәбез. Әмма үз кулларың белән тегү-чигү – авыррак булса да, күңеллерәк кебек. Без менә нәкъ менә кулдан чигү, тегү йолаларын саклап калырга тырышабыз, - ди ул үзе.
  Рамилә үзе Дәвеш балалар бакчасында кече тәрбияче булып эшли. Кызлары Дәвеш мәктәбендә белем алалар. “Сәләт” балалар иҗат үзәге тарафыннан оештырылган түгәрәккә дә бик яратып, теләп йөриләр.
  -Анда төрле һөнәрләргә, кул эшләренә укытучы апалары Гөлнур Салаватуллина да өйрәтә. Түгәрәккә йөри башлагач, алар тагын да остардылар. Балаларымның шундый матур шөгыльләр белән мавыгуларына үзем дә сөенәм, - ди Рамилә.