Математика укытучысы 3 балаларының анасы булган хатынын үтергән

  Гаилә моңа кадәр тәртипле саналган. Әмма 41 яшьлек хатынының ирен көнләвен белгәннәр.

  3 декабрьдә ир өйгә соң кайта. Ул авылга кайтып, шәхси йортта мич ремонтлаган була. Хатыны, бу эш шулкадәр озак була алмый дип, ирен «игәүли» башлый. Талаш бик соң, төнлә диярлек башлана. Ир балаларын йокларга яткыра һәм, йокы бүлмәсенә кереп, хатыны белән сөйләшүен дәвам итә. Балалар сәер тавышлар ишеткәннәр, әмма, куркып, кермәгәннәр.

  Иртән балалар уяна, мәктәпкә әзерләнә башлый. Гадәттәгечә, әниләрен кочакларга теләгәннәр, әмма ир йокы бүлмәсенә кермәскә куша, әниегез арыган, тимәгез, ди. Бу вакытта инде хатын үлгән була.

  Тикшерү комитеты ачыклаганча, хатын аерылышырга теләвен әйткәч, ир аны үтергән.

  «Комсомольская правда» язуынча, хатын ирен көнләп кенә калмаган, аз хезмәт хакы алуда гаепләгән. Ир үзе бик тырышкан, эштән соң кайтып, ремонт ясап йөргән. Фаҗига булган көнне дә ул заказ буенча ремонт ясаган була. Мәктәптә ирне мактаганнар һәм моңа кадәр агрессия күрсәтмәгәнен, җаваплы укытучы булганын, тырышып эшләгәнен искәрткәннәр. Алар бу хәлгә бик нык гаҗәпләнгән.

_{Чыганак:https://intertat.tatar/news/matematika-ukytucysy-3-balalarynyn-anasy-bulgan-xatynyn-utergan-5870039}

_{Фото: «Интертат»}