Апаста “Безнең ишегалды“ проекты кысаларында халык белән очрашулар узды

Апаста да “Безнең ишегалды“ проекты кысаларында очрашу узды. Биредә Яшьләр урамында күпфатирлы йортларда яшәүчеләр катнашты. Очрашу “Бердәм Россия“ фракциясе теләктәшлеге белән уза һәм анда төрле тармак җитәкче-белгечләре, авыл җирлеге вәкилләре дә катнаша. 
- "Безнең ишегалды" проекты буенча программа киләсе елдан гамәлгә ашырылачак. Ишегалларында яңа асфальт юллар, тротуарлар, брусчаткалар, урам яктырткычлар булачак. Шуңа да, хәзердән үк тормышыбыз шартларын уңайлы итү турындагы фикерләрегез бик мөһим. Барыгызның да актив катнашуын, тирә-юньне матур, чиста, төзек итү өчен эшлекле тәкъдимнәрегезне җиткерүегезне сорыйбыз, - дип мөрәҗәгать итте район башлыгы урынбасары, районның җирле “Бердәм Россия“ фракциясе җитәкчесе Ленар Хантимиров. 
Очрашуга килүчеләр арасында төрле яшьтәгеләр бар иде. Арада фатирлар янәшәсенә төзелгән сарай, мунча, бакчаларны сүтмәү тәкъдиме белән чыгучылар да булды. Алар уңай җавабын да алды. Бары тик корылмаларны закон таләп иткәнчә рәсмиләштерергә киңәш ителде. Подъездларны төзекләндерү мәсьәләсе дә яңгырады. Шулай ук машина кую өчен урыннар булдыру, балалар мәйданчыкларын арттыру хакында да сүз булды. Күпфатирлы йортларда яшәүчеләрнең тәкъдимнәре ишегалларын төзекләндерү буенча булачак проектка кертелә. 
Ләйлә Шиһабиева.