Апаста гаилә белән барып кечкенә салютлар ату өчен урыннар билгеләнде

 (30 нчы декабрь, “Апаство-информ”).
Район хакимияте утырышлар залында яңа ел бәйрәм көннәрен хәвефсез уздыру турында киңәшмә узды. Биредә барлык өлкә җитәкчеләре дә катнашты.
“Бәйрәм көннәрендә дежурлар билгеләнде. Һәрбер өлкә җаваплылык тоеп эшләргә тиеш. Без райондашлар һәм кайткан кунакларның бәйрәме күңелле булсын өчен тырышабыз”, - диде район башкарма комитеты җитәкчесе Булат Әхмәтҗанов.
Шулай ук балалар өчен алынган кечкенә шартлаткычлар турында да сүз булды.
“Яңа ел бәйрәме балалар өчен. Һәрбер әти-әни кечкенә салютлар ала. Ә аларны кулланыр өчен аерым урыннар билгеләнде. Апаста “Табарка”яр буенда һәм әппәздәге вертолет төшү урынында 21.00 сәгатьтән 22.00 сәгатькә кадәр кулланырга мөмкин. Шулай ук һәрбер авыл җирлегендә урыннарны җирлек башлыклары билгели. Үзебезне һәм якыннарыбызны саклыйк”, - диде районның гадәттән тыш хәлләр бүлеге җитәкчесе Павел Тихонов.