Чит хаталардан гыйбрәт ал: Чистайда янгын чыккан

Районның янгын куркынычсызлыгы бүлеге хәбәр итүенчә, 14 гыйнварда Чистайда торак йортта янгын чыккан. Төнге 2 сәгать 41 минутта бирегә янгын сүндерүчеләр килә. Янгын сүндерүчеләрне каршы алган күршеләре йорт эчендә кеше булу ихтималын белдерә. Утны йөгәнләгәндә ир кешенең гәүдәсе табып алына. 1983 елгы ир-ат өйдә ялгыз яшәгән, еш кына исерткечләр кулланган. Янгын тәмәке тартканда куркынычсызлык кагыйдәләрен үтәмәгәннән чыккан дип фаразлана. Ут белән сак булыгыз! Ялкын телләре санаулы вакыт эчендә бар булганны юк итәргә сәләтле.