Каратун станциясендә Бөек Җиңү көнен зурлап бәйрәм иттеләр.

(8 нче май, “Апастово-информ”).
Тантанада район башлыгы урынбасары Ленар Хантимиров, дин әһелләре, ветераннар Советы, тыл ветераннары катнашты.
Бәйрәм чарасы авыл җирлеге башлыгы Радик Исмәгыйлев чыгышы белән башланып китте.
“Хөрмәтле авылдашлар, кунаклар! Бүген Бөек Җиңүнең 79 еллыгын каршыларга җыелдык. Безгә азатлык һәм матур тормыш бүләк иткән әби-бабайларыбызны искә алабыз. Алар даны мәңгелек. Шулай ук җирлектән 23 егетебез махсус хәрби операциядә. Аларның гаиләләренә иминлек, сабырлык, үзләренә исән-имин кайтуларын теләп калабыз. Ил-көннәребез тыныч булсын!”, - дигән теләкләрен ирештерде ул.
Район башлыгы урынбасары Ленар Хантимиров чарада катнашучыларны район башлыгы Айрат Җиһаншин исеменнән котлады.
“Хөрмәтле ветераннар, катнашучылар! Барыгызны да бүгенге зур, матур бәйрәм белән тәбрик итәм. Тизрәк махсус хәрби операцияләр тәмамланып, егетләребезнең исән-имин кайтуларын теләп калам. Ил-көннәребез тыныч булсын!”, - дигән теләкләрен ирештерде.
Балалар бакчалары, мәктәп, җирлектәге оешмалар тарафыннан веноклар салынды. Бәйрәм балаларның һәм өлкәннәрнең чыгышлары белән үрелеп барды.