Киләчәккә калсын бу гүзәллек!

Гөлләр арасыннан кызлар килә,

Тек-тек итеп тигез ташка басып,

Чибәрлеге белән таң калдырып,

Якты йөзләреннән нурлар чәчеп!

Көлә-көлә чибәр кызлар килә,

Ал гөлләрне микән көнләштереп?!

Әллә егетләрне уйга салып,

Янган йөрәкләрен телеп-телеп.

Гөлләр арасында кызлар йөри,

Сыйпап чәчкәләрне иелеп-иелеп.

Фонтаннардан аккан көмеш сулар

Оча җилдә ләйсән булып сибелеп.

Урам тулы гөлләр чәчәк аткан,

Гүзәллекне кил дә күреп кал!

Җаның тынычланыр бу сихәттән,

Онытылыр бөтен борчулар!

Гасырларга калыр бу гүзәллек -

Апас чәчәк аткан шушы чор!

Тукталмасын фонтаннардан сибелеп,

Челтер-челтер килгән сихри җыр!

РӘИС ВАҺАПОВ. ДҮРТӨЙЛЕ.