«Мәетен плитә астында тапканнар»: 14 яшьлек үсмер буада батып үлгән

  – Матвейны 14:20 сәгатьтә ул су астына киткән урыннан ерак түгел генә, плитәләр астында таптылар. Аны шунда ук эзли башласалар, коткарып кала алырлар иде, – дип сөйләгән малайның дусты.

Үсмерне эзләүдә Урал коткару отрядыннан 4 водолаз катнашкан.

Хәбәр ителгәнчә, укучылар компаниясе шәһәр буасына су коенырга китә. Анда суның шактый җылы булуы әйтелә, ләкин сулыкта көчле агым була.

Бер версия буенча, яшүсмерләр үзара «кем яхшырак йөзә» дип бәхәсләшкән һәм күпердән суга сикергән.

Матвейның соңгы секундлары видеога эләккән. Анда яшүсмернең су астына китүен күрергә мөмкин. Шул мизгелдә аның янында бер кыз да бата башлаган, аны судан дусларының берсе чыгарган, ләкин Матвейны коткарырга өлгермәгән.

– Егетләр күп булган, барысы да сөйләшкәннәр, күңел ачканнар, нәрсәдер булырга мөмкин дип уйлап та карамаганнар, шуңа күрә булган хәлне вакытында күрмәгәннәр. Монда беркемне дә гаепләп булмый, сак булыгыз, – диләр Матвейның туганнары.

Россия Федерациясе Тикшерү комитетының Свердловск өлкәсе буенча тикшерү идарәсендә хәбәр итүләренчә, үлемнең төгәл сәбәбен билгеләү өчен суд-медицина экспертизасы үткәрелә.

Үсмер 7 нче сыйныфта укыган. Танышлары аның бик ярдәмчел булуын әйтә. Футбол белән шөгыльләнгән булган һәм яхшы укыган, диелә хәбәрдә.

_{Чыганак:https://intertat.tatar/news/maeten-plita-astynda-tapkannar-14-yaslek-usmer-buada-batyp-ulgan-5873257}

_{Фото: Россия Федерациясе Тикшерү комитетының Свердловск өлкәсе буенча тикшерү идарәсе, https://t.me/sledcom_sverdlovsk}