Шыгайда Әмир Камалиевны искә алдылар

(31 май, “Апастово-информ“).

Якташыбыз үзе арабызда булмаса да, аның исеме телдән төшми, иҗатына еш мөрәҗәгать ителә, әсәрләре сәхнәдән яңгырый. Бу көннәрдә туганнары, якыннары, дуслары, хезмәттәшләре аны кабат искә алды.

“Каберенә бардык, чәчәкләр куйдык, аның рухына багышлап дога кылдык. Абыебыз турында җылы, матур сүзләр яңгырады. Алар бар да абыебызга дога булып барып ирешсен“, – ди энесе, Шыгай авылы клубы мөдире Дамир Камалиев.

Әмир Камалиев Татарстанның Апас районы Шыгай авылында туа. 1984 елда Мәскәүдә театр училищесына укырга керә. 1988 елда Галиәсгар Камал исемендәге Татар дәүләт академия театрында актер булып эшли башлый. 1992 елда аның Аманулла псевдонимы астында язылган "Җәйге кырау" драмасы Чаллыда куела. Шуннан башлап төрле драмалар иҗат итә, җыентыклары чыга.