Татарстан елга транспортында яңа чор башлана: Рөстәм Миңнеханов Татарстан инфраструктураны тулысынча куллану кирәклеген әйтте

  Түгәрәк өстәлне республиканың транспорт һәм юл хуҗалыгы министры Фәрит Хәнифов алып барды. Чарада шулай ук Бурятия Республикасы башлыгы, «Нәтиҗәле транспорт системасы» юнәлеше буенча Дәүләт Советы комиссиясе рәисе Алексей Цыденов та катнашты.

Рөстәм Миңнеханов сөйләгәнчә, бүгенге көндә Татарстан икътисадының тотрыклы үсеше өчен логистик чылбырларны киңәйтү — иң мөһим бурычларның берсе. Ул ассызыклады:

«Елга инфраструктурасын тулысынча файдаланырга кирәк. Эшләп килгән порт һәм причалларны яңартырга, заман таләпләренә туры килгән яңа объектлар төзергә, һәм аларны автомобиль һәм тимер юллары белән бәйләп, мультимодаль логистика мөмкинлекләрен киңәйтергә кирәк».

Республика елгалары Балтыйктан Каспий һәм Кара диңгезенә кадәр йөк ташу мөмкинлеген бирә, шул исәптән халыкара «Төньяк – Көньяк» транспорт коридоры аша да.

Тимер юлның роле бу логистик системада аеруча зур. Рөстәм Миңнеханов тәкъдим итте:

«Татарстан җитештерү куәтләрен исәпкә алып, „Россия тимер юллары“ белән берлектә республиканың логистик үзәкләренә бәйле электрлаштырылган тимер юл инфраструктурасын үстерү мәсьәләсен карарга кирәк».

2024 елда Свияжск төбәкара мультимодаль логистик үзәгенең ачылуы уңай мисал булып тора. Ул «Төньяк – Көньяк» һәм «Европа – Көнбатыш Кытай» коридорлары кисешендә урнашкан, федераль тимер юлларга һәм автомобиль юлларына чыгу мөмкинлеге бар, шулай ук Россиянең Европа өлешендәге бердәм тирәнсу системасы аша өч диңгезгә чыга ала.

Республика Рәисе билгеләп үтте: федераль хакимият органнары белән берлектә йөк ташуны үстерү максатында үзгәрешле тариф сәясәтен булдырырга кирәк. Бу исә су транспортында йөк ташуны арзанлату, судноларның гарантияләнгән габаритларын саклау, шулай ук елга флотын заманча йөк судналары белән яңартуны үз эченә ала.

Рөстәм Миңнеханов Россия Хөкүмәтенә һәм Транспорт министрлыгына төбәкләрдә федераль һәм халыкара йөк ташу үсешенә игътибарлары өчен рәхмәт белдерде һәм уртак тырышлык белән Татарстан мультимодаль пассажир һәм йөк ташуны үстерүдә төп регионга әвереләчәк дип ышандырды.

РФ транспорт министры Андрей Никитин да Татарстанның стратегик урынына басым ясады:

«Идел буе Татарстан өчен төп су артериясе булып тора. Республика халыкара транспорт коридорларын үстерүдә зур роль уйный. Без аны эчке су юлларын үстерү буенча эш башлау өчен старт ноктасы итеп карыйбыз. Татарстан гамәлгә әзер», — диде министр.

2026 елда Татарстан белән Росморречфлот арасында Нократ елгасы суднолары йөреше шартларын яхшырту, эчке су юллары инфраструктурасына субсидияләр бирү турында килешү төзү планлаштырыла.

РФ транспорт министры урынбасары Борис Ташимов сүзләренчә, эчке су транспортында йөк әйләнешен торгызу — төп бурычларның берсе. Узган ел нәтиҗәләре буенча йөк күләме 2024 елга карата 14% кимегән. «Бу трендны бетерү өчен безгә регионнар белән берлектә инфраструктураны торгызу буенча комплекслы чаралар кабул итү мөһим. Сүз эчке су юллары, гидроузеллар һәм елга портлары турында бара», — диде Борис Ташимов.

_{Чыганак:https://tatarstan.ru/tat/index.htm/news/2489134.htm}