Урта Балтай авылы китапханәсендә “Буыннар чылбыры өзелмәсен” дигән кичә узган

(29 март, “Апастово-информ”).

Кичәне авыл абыстае Мөнирә ханым авыл китапханәчесе Эльвира ханым белән әзерләгәннәр.
“Биредә туган телебез, динебез - милләтебезнең нигезе булып торуына басым ясалды. Балалар, өлкәннәр матур итеп мөнәҗәтләр көйләделәр. Кичәдә өлкәннәр дә, балалар да күп катнашты. Авылда киләчәктә дә гореф-гадәтләребез сакланып, буыннар чылбыры өзелмәс дигән ышаныч туды. Авыл җирлеге башлыгы Илфир Гәрәев әдәп-әхлак тәрбиясендә дин әһелләре, мәктәп, китапханә, мәдәният йорты хезмәткәрләре тыгыз элемтәдә эшләүләре турында сөйләде”, - дип хәбәр итәләр район мөслимәләр берлегеннән.
Кичәдә шулай ук район мөхтәсибе Мирхәт хәзрәт, Шәһит хәзрәт һәм мөслимәләр берлегеннән вәкилләр катнашкан. Алар да тирән мәгънәле вәгазьләр сөйләп, катнашучыларны уйланырга мәҗбүр иткәннәр. Оештыручыларга зур рәхмәтләрен җиткергәннәр.