Матур һәм һәммәбезгә кирәк, ник тиясез аларга?

Район үзәге Апаста, Әнәле юлында һәм Каратунда "Апасэнергосервис" ширкәте осталары соңгы 3 елда матур, тимер бизәкле баганаларга бер һәм ике шарлы 1250 дән артык яктырткыч куйгач юл-тротуар читләре әнә ничек матурланды. Төннәрен дә якты һәм халык өчен бик уңайлы.

Алар аерым линиягә махсус кабызгычлар аша кушылган, заманча һәм утны да аз "ашыйлар". Ә бар шундый кемсәләр, аларны аударып, шарларын ватып йөрүдән хайвани бер тәм табалар, диярсең… "Былтыр шундый мәгънәсезләр 32 яктырткычны ватты-җимерде, 7 багананы аударды. Үз хисабыбыздан төзәттек. Район полициясе шиклеләрнең эзенә төшеп килә инде. Гаепләре расланган очракта, алар яки әти-әниләре меңләгән сум белән исәпләнүче китерелгән зыянны үз кесәләреннән түләячәк. Җәмәгать милкенә зыян салган өчен андыйларга җинаять җаваплылыгы да каралган",- ди бу ямьсез, күңел кайтаргыч күренешне шәрехләп, ширкәт җитәкчесе Илдар Сөләйманов.