Апаста демографик хәлне яхшырту буенча мөһим эшләр башкарыла

Әлеге төркем үз эшен Табар Черкене авылы җирлегендә башлап җибәрде. Бүген бу җирлектә яшәүче яшь хатын-кызлар, гаиләләр белән түгәрәк өстәл артында җылы очрашу узды. Район башкарма комитеты җитәкчесе урынбасары Луиза Сафина бу очрашуларның, профилактик чараларның мөһимлеген белдерде. 
- Хәзер кешеләр дөнья мәшәкатьләренә чумып, бер-берсен күрмичә яшиләр. Иртән эшкә йөгерсәләр, кичен исә кабат өй эшләренә керешәләр. Бу профилактик чаралар, очрашулар яшьләргә, ялгызларга бер-берсе белән аралашырга зур мөмкинлек тудыра. Киләчәктә мондый очрашулар башка авыл җирлекләрендә дә узачак. Шулай ук безнең районда күп еллар эшләп килүче “Ак җилкән“ таныштыру һәм кавыштыру клубы да үз эшен дәвам итеп, насыйп ярларын табарга өлгермәгән егет-кызлар катнашында чаралар уздырачак, - диде ул. 
Очрашуда белгечләр үз тәкъдимнәрен, фикерләрен җиткерделәр. Район хастаханәсенең баш табибы урынбасары Талия Сафиуллина барыннан да бигрәк сәламәтлеккә зур игътибар бирергә кирәклеген ассызыклап, киңәшләрен бирде.