Апас укучылары Иске Йомралы фермасында кунакта

Апас урта мәктәбенең Гөлшат Насретдинова җитәкчелегендәге 4 "А" классы укучылары Иске Йомралы фермасында кунакта булдылар. Алар ферманың барлык бүлекләре белән дә танышып чыктылар. Ферма мөдире Рәүфә Хәйрова эш шартлары, үзенчәлекләре турында сөйләде.
-Иртәнге сәгать 4тә эшкә киләбез. Малларны ашатабыз, асларын карыйбыз, сыерларны савабыз, кечкенә бозауларга сөт бирәбез, кирәк чакта дәвалыйбыз да. Терлекләрне яратабыз, - диде ул.
Укучылар үзләре дә малларны сыйпап-сыйпап карадылар. Бигрәк тә кечкенә бозауларны яраттылар. Укытучылары Гөлшат Насретдинова терлекләр дөньясын өйрәнүне табигать белеме дәресендә дәвам итәчәкләрен әйтте.