Әбиләр чуагында – Кызыл туй

Көз муллыгы, гүзәллеге белән сөендергән, ямьле әбиләр чуагы барган көннәрдә Кызыл туйларын билгеләп үтүче райондашларыбыз да бар. Кече Бакырчы авылы егете Ленар Вәлиуллин тормыш яры итеп Урта Балтай кызы Алинә Мөхәммәтҗанованы сайлады. Яшьләр кавышу көннәрен якыннары, дуслары янәшәсендә истә калырлык итеп үткәрде. Алар шулай ук изге гамәл кылырга да онытмады. ЗАГС бүлегенә Анжела Вавилова исемендәге балаларга ярдәм итү шәфкатьлелек фонды тарафыннан куелган тупланма кубка Вәлиуллиннар гаиләсе дә акча салды. Биредә җыелган барлык акчалар да Казан шәһәренең балалар хосписында дәваланучы нарасыйлар өчен җибәреләчәк.