Блиц-конкурсның җиңүчесе билгеле булды

Район Пенсия фонды коллективы узган атнада ук район үзәгендә иң беренчеләрдән булып ясаган Кыш бабайлар кар композициясе фотосын "Йолдыз" сайтына куйган идек. Стерео-3D- Кыш бабайларны кардан ясаучы авторларны иң беренче булып Апас мәктәбенең 3 сыйныф укучысы Ранил Әхмәтҗанов танып алган. Район Пенсия фондына иң беренче булып килеп җиткән. Район Пенсия Фонды җитәкчесе Илгизәр Вәлиәхмәтов шунда ук редакциягә шалтыратты:

-Аны зур кунак итеп каршыладык. Сынчылар аңа үз бүләкләрен тапшырдылар, җиңүчегә рәхмәт әйттек,-диде.

Апаста, авылларда хәзер күп коллективлар, аерым кешеләр шундый матур кар сыннары ясау белән мәшгүль. Алар арасында да балалар өчен шундый блиц-конкурслар игълан итәргә теләүчеләр "Йолдыз" редакциясе белән элемтәгә чыкса, алар үтенечен дә рәхәтләнеп үтәргә сүз бирәбез!

Ришат Җамалиев.