Барысы да дистантка: Атипик үпкә ялкынсынуы мәктәпләрне карантинга яба

Ата-аналар бойкоты

  Күптән түгел республикада стандарт пневмококк түгел, ә микоплазма китереп чыгарган үпкә ялкынсынуы белән авыручыларның артуы турында хәбәр ителгән иде. Инфекционистлар әйтүенчә, микоплазмалы үпкә ялкынсынуы (аны әле «атипик» дип тә атыйлар) 4-5 елга бер була, һәм быел нәкъ менә шул күзәтелә.

  Октябрь ахырында республика мәктәпләрендә һәм балалар бакчаларында иртәнге фильтрларны көчәйттеләр, әмма мәкерле микоплазма барыбер балалар коллективларына үтеп керде.

  «Көек лицеенда берничә сыйныфны укучылар авыру сәбәпле карантинга япканнар, ә башка ата-аналар бойкот оештырган һәм балаларны мәктәпкә вакытлыча җибәрмәскә карар кылган. Шулай ук алар Татарстан Мәгариф һәм фән министрлыгына һәм Татарстан Республикасы буенча Роспотребнадзорга мөрәҗәгать язган», – дип яздылар Казан телеграм-каналларында.

  – Әйе, безнең балалар арасында үпкә ялкынсынуы очраклары бар. Тик ата-аналарның бунтлар оештыруын һәм мәктәпкә ничек дөрес эшләргә кирәклеген өйрәтүен мин аңлый алмыйм, – ди Көектәге «Алгоритм» лицее директоры Лиса Глибина. – Авыруның беренче очрагыннан соң Роспотребнадзор безгә гамәлләр алгоритмын җибәрде, аның нигезендә сыйныфта үпкә ялкынсынуының 1 очрагы ачыклаганганда, мин бу сыйныфтагы балаларны башкалардан аерырга тиеш. Ягъни алар бер сыйныфта шөгыльләнәләр, мәктәп буйлап йөрмиләр, укытучылар аларга үзләре килә, ә ашарга алар дәрес вакытында йөриләр. Әгәр сыйныфта 2 һәм аннан да күбрәк үпкә ялкынсынуы очрагы ачыкланса, класс дистантка җибәрелә. Бүгенге көндә мондый вазгыять безнең бер сыйныфта гына, анда 2 очрак, шуңа күрә алар дистантта. Һәм дүрт класс аерым укый, анда берәр очрак.

Боларга өстәп корчаңгы һәм гөмбәчекләр

  Лицей директоры сөйләгәнчә, дүшәмбе иртәсендә барлык сыйныфлардан мәгълүмат җыйганда, ул бишенче сыйныф укучыларының ата-аналары бойкот оештырып, дәресләргә 6 баланы алып килмәүләрен ачыклаган.

  – Җомга көнне алар миңа сыйныфларын дистантка җибәрүне сорап хат юллады. Мин аларга шулай ук язмача җавап бирдем һәм барлык нормалар буенча карантинга җибәрергә хокукым юклыгын белдердем. Әйе, авыру хәзер бөтен җирдә йөри, барысы да йоктырудан курка, мин дә ата-аналарны аңлыйм, тик мин карантин турында карарны үзем генә кабул итә алмыйм. Минем мәктәптә 102 сыйныф, 3,5 меңгә якын бала, мин барысының да куркынычсызлыгын тәэмин итәргә бурычлы. Барлык чараларны да, шул исәптән биналарны эшкәртү буенча да, без башкарабыз, – ди Глибина.

  Исегезгә төшерәбез, санитария нормалары нигезендә, сыйныфта авыру балалар саны 20 проценттан артып китсә генә сыйныф карантинга ябыла. Әмма «Алгоритм»да әлегә андый санда авыручы юк.

  Питрәч районы мәгариф бүлегендә өстәмә рәвештә хәбәр итүләренчә, үпкә ялкынсынуыннан тыш, «Алгоритм» лицееның тагын биш сыйныфында корчаңгы һәм гөмбәчек авырулары (дерматофития) аркасында аерым укыту режимы кертелгән.

10нан артык очрак – бөтен мәктәп карантинга

  Казан Мәгариф идарәсендә хәбәр итүләренчә, пневмония аркасында шәһәрдә 2 мәктәп – «Салават Күпере» торак комплексындагы 182нче лицей һәм Киров районының 135нче мәктәбе дистантка җибәрелгән. Көндезге укуга балалар киләсе дүшәмбе, 2 декабрьдә чыгачак.

  – 182нче лицейда – 13, 135нче мәктәптә 11 авыру очрагы ачыкланган, – дип ачыклык керттеләр идарәдә. – Бу ике мәктәптә 3,8 меңнән артык бала белем алуга карамастан, анда әлегә башка очраклар теркәлмәгән. Санитар-эпидемиологик таләпләр буенча 10нан артык пневмония очрагы теркәлгәндә мәгариф оешмасының эшчәнлеген вакытлыча туктатып тору оештырыла.

  Дөрес, «Салават Күпере»ндәге 182нче лицейда 21 ноябрьдән дистантта бары тик яңа бинада укучы 5-11 сыйныф укучылары гына булуын хәбәр иттеләр.

Пневмония белән авыручылар ташкыны

  Үпкә ялкынсынуы белән авыручылар саны артуы турында табиблар да сөйли.

  «2 көн рәттән үпкә ялкынсынуы белән авыручылар ташкыны күзәтелә. Мин эшемнән 2-3 сәгатькә соңарып чыгам. Безнең хастаханәләрнең кабул итү бүлекләрендә зур чиратлар, бигрәк тә йогышлы авыруларны кабул итүдә. Үпкә ялкынсынуы белән килүчеләр бик күп», – дип сөйләде үз блогында танылган Казан пульмонологы Татьяна Неешпапа.

  – Үпкә ялкынсынуы быел чыннан да бик күп, һәм хәзер алар нәкъ менә микоплазма инфекциясе белән бәйле. Аның белән ешрак мәктәп һәм мәктәпкәчә яшьтәге балалар авырый, – диде Татарстан Сәламәтлек саклау министрлыгының баш инфекционисты Халит Хәертынов. – Үпкә ялкынсынуы белән авыручы өлкәннәр арасында 10 проценты гына микоплазмага туры килә. Микоплазма үпкә ялкынсынуы булган күпчелек пациентларда сулыш алу җитешсезлеге булмый, шуңа күрә аны амбулатор рәвештә дәваларга мөмкин.

 Табиблар әйтүенчә, микоплазмалы үпкә ялкынсынуын гади кан анализы белән ачыклап булмый, аны бары тик авыз куышлыгыннан ПЦР үрнәк алып һәм микоплазма антитәнчекләренә махсус анализ биреп кенә белеп була. Шул ук вакытта микоплазмага классик пневмония вакытында ярдәм итә торган антибиотиклар тәэсир итми, башка рәттәге препаратлар кирәк. Шуңа күрә әгәр балада температура һәм йөткерү булса, ата-аналарга үз-үзеңне диагностикалау һәм дәвалау белән шөгыльләнергә кирәкми, белгечләргә мөрәҗәгать итәргә кирәк.

  ТР Мәгариф һәм фән министрлыгыннан хәбәр итүләренчә, бүгенге көндә грипп һәм ОРВИ белән авыручылар саны буенча мәктәпләрнең 20 сыйныфында аерым укыту каралган, ә Казанның 4нче интернат-мәктәбе, кызамык белән авыручылар саны ачыклану сәбәпле, карантинга ябылган.

  _{Чыганак:https://intertat.tatar/news/barysy-da-distantka-atipik-upka-yalkynsynuy-maktaplarne-karantinga-yaba-5869764}

  _{Фото:https://ru.freepik.com/free-photo/blur-hospital_1135176.htm#fromView=search&page=1&position=4&uuid=7329ace2-aec6-404d-be65-a6f98e5d1669}