Апаслылар алдан тавыш бирүләрдә актив катнаша

Район буенча 11 исәп участогы эшли. Апаслылар "Бердәм Россия" партиясеннән булган кандидатлар өчен алдан тавыш бирүләрдә яше-карты актив катнашалар.

Апас мәктәбендә урнашкан исәп участогына халык иртәнге сәгать 8 тулганчы килә башлады. Музыка уйнап тора, килүчеләргә кайнар коймак, чәй тәкъдим ителә.

- Илләр-көннәр тыныч булсын. Кандидатларның сүзләре үтемле, эшләре уңышлы булсын, - диләр Дания һәм Искәндәр Шәмсетдиновлар.

Йомралы, Күккүз исәп участокларында да аерым бер күңеллелек.

- Өстәлләребез ризыклы, менә шифалы яңгыр да бу җаваплы көнне көткән диярсең. Табигать яшәреп, җанланып китте, - ди игенче - механизатор Әнвәр Сәгытдинов сөенеп.

Район башлыгы Рәшид Заһидуллин һәм "Ак Барс" Банк рәисе Зөфәр Гәрәев исәп участокларында булып тавыш бирүләрнең барышы белән таныштылар.