Мәскәү – Казан трассасын төзү өстәмә агач кисүне таләп итми

(23 октябрь, “Татар-информ”, “Апастово-информ”).

Мәскәү – Казан тиз йөрешле М12 автомобиль юлы төзелеше өстәмә агач кисүне таләп итми. Бу хакта «Институт Гипростроймост – Санкт-Петербург» АҖ вәкиле Андрей Резвяков автомобиль юлын төзү буенча эшче төркем утырышында хәбәр итте.
«Бөтен урман кисү эшләре бүлеп бирелгән полоса чикләрендә башкарылачак. Автомобиль юлы өчен, бүлеп бирелгән урыннан тыш, бернинди кисү дә каралмаган. Экологик нормалар шулкадәр катгый, без экспертиза узарга тиеш, шул исәптән урман буенча да", - дип сөйләде проектант.
Резвяков трассаны төзегәндә «урманчылар белән бергә һәр агачны исәпкә алачаклар», дип ышандырды. Моннан тыш, аның сүзләренә караганда, агач утырту өчен компенсация каралган. "Моны объектларны проектлау тәҗрибәсеннән чыгып әйтә алам", - дип дәвам итте ул.
Хәзерге вакытта автомагистраль төзелешен оештыру проекты эшләнмәгән, ул проект документациясен әзерләү стадиясендә барлыкка киләчәк, дип билгеләп үтте Спикер. «Төзелеш материаллары бүлеп бирелгән урында сакланачак. Ком яки вак таш салу өчен өстәмә рәвештә агачлар кисмәячәкбез. Җирле юллардан файдаланачакбыз. Әлегә бүлеп бирелгән полосада юл салыныр дип уйлыйбыз», – дип төгәлләде Резвяков.
ТР Дәүләт Советының Торак сәясәте һәм инфраструктура үсеше комитеты рәисе Александр Тыгин фикеренчә, төзелеш материалларын урнаштыруга бәйле бернинди проблема да булырга тиеш түгел. «Без бит бик күп юллар төзибез. Инерт материаллары һәрвакыт аерым мәйданчыкларда саклана. Мәсәлән, без техниканың кышкы саклауга кайда торуын билгелибез. Бу очракта да проектант саклау урынын билгеләячәк, әмма бу исә урман мәйданы булачак дигән сүз түгел», – дип билгеләп үтте депутат.
ТР Урман хуҗалыгы министрының беренче урынбасары Илгизәр Зарипов ассызыклаганча, компенсацияләнүче агачларны утырту өчен республиканың Лаеш районындагы участоклар карала.
ТР Транспорт һәм юл хуҗалыгы министры Фәрит Хәнифов искә төшергәнчә, М12 республиканың биш муниципаль районы буенча узачак. Автомобиль юлының гомуми озынлыгы 729 км тәшкил итәчәк, шул исәптән 142 км – Татарстанда. Магистральне төзегәндә республикада биш зур чишелеш, шулай ук ясалма корылмалар һәм кичүләр төзү планлаштырыла. Моннан тыш, дүрт тукталыш комплексы каралган. "Төзелеш яңа эш урыннары булдырачак, шул исәптән катнаш тармакларда да шактый күп», – дип йомгаклады Транспорт министрлыгы башлыгы.
Татарстан Дәүләт Советында Мәскәү – Казан тиз йөрешле автомагистрален төзү буенча эшче төркем утырышы узды. Төркем составына кайбер министрлык һәм Казанның ведомство вәкилләре, шулай ук автомагистраль үтүче торак пунктларда яшәүчеләр керә.