Апаста төннәрен тагын да яктырак булачак

Апасны төзекләндерү программасы дәвам итә. Район үзәгенә Казаннан сакчыл технологияләр генә кулланучы төзелеш компаниясе вәкилләре килде. Апасның әйләнеч юлы боҗрасы, Каратун ягыннан Апаска керү олы юл читләрендә җирне бораулап, тимер нигез-терәкләр монтажланды, шуларга махсус тимер, декоратив яктырту баганалары куела башлады. Аларның гомуми саны 100 дән артык булып, реконструкцияләнгән яктырту линияләренең гомуми озынлыгы 5 километр чамасы булачак. Яктырткычларга энергияне янга калдыручы фотодиодлы яңа типлы лампочкалар куелачак. Сүндерү-кабызуны автоматика башкарачак. Яктырткычларга ут линиясе җир астыннан киләчәк. Бу эшләр вакытында асфальт юл-тротуарларны бозмас өчен җир астыннан горизонталь бораулау агрегатлары кулланылачак. Үзебезнең энергетиклар һәм элемтәчеләр әйтүенчә, соңгы 5 елда районда шундый ысул белән юлларны, җир асты коммуникацияләрен һәм җир өстен бозмыйча гына борауланган җир асты горизонталь күчү канал-траншеяларының гомуми озынлыгы 25 километрга якын. Реконструкциядәгә кадәр куелган шарлы фонарь-яктыртычлар, баганалар да киләчәктә эшкә ярарлык әле, аларын сак кына сүтеп алып башка урыннарга һәм авыл җирлекләренә күчерәчәкләр.