Егетләргә ярдәмебез аша туган як җылысын җиткерик

Махсус хәрби операция башланганнан бирле бездән читтә булган егетләргә, аларның гаиләләренә күп кенә ярдәм чаралары оештырылды. Гуманитар ярдәм җыю бу көннәрдә кабат яңарды.

-Җәмәгать оешмалары, хәрби хәрәкәт ветераннары, дин әһелләре, өлкәннәр җыелып сөйләштек тә, гуманитар ярдәм итүне дәвам итәргә булдык. Бездән читтә булган егетләргә көндәлек кирәк әйберләр күп. Аны гадәти тормышыбызны дәвам иткәндә аңлап кына бетермибез, - ди Татарстан Республикасының Сугыш хәрәкәтләре Ветераннарының Координацион Советының Апас районы бүлеге җитәкчесе Фәнис Зәйнуллин.

Бу эшкә иң беренчеләрдән булып әфганчы егетләр кушылган. Алар үзләренең пенсияләреннән 1әр мең акча күчерергә булган. Егетләргә райондашларыбыз да кушылган.