Иске Әнәле авылы мәчетендә мәүлид кичәсе узды

Бүген Иске Әнәле авылы халкы авыл мәчетенә Мәүлид кичәсенә җыелды. Мәҗлесне уздыруда һәркем үз өлешен керткән. Күмәк көч белән мул табыннар корылган. - Пәйгамбәребез Мөхәммәд Мостафа салләллаһү гәләйһи вә сәлләм дөньяга килгән көнне бергәләп билгеләп үтәбез. Тормышыбыз мул, авылыбызда күп кенә эшләр башкарабыз. Алга таба да бердәм булып яшәсәк иде, - диде авыл мәчете имамы Мостафа хәзрәт Идиятуллин.
Биредә район башкарма комитеты җитәкчесе урынбасары Луиза Сафина, район мөхтәсибе Мирхәт хәзрәт Җамалиев, Татарстан Диния нәзарәтенең зәкать фонды җитәкчесе Ирек хәзрәт Җиһаншин катнаштылар. - Аллага шөкер, безнең район халкы динебезне хөрмәт итеп яши. Безнең көн саен авыл җирлекләрендә Мәүлид кичәләре уза. Эшләребез дә уң бара, тормышыбыз да җитеш. Бергәләшеп укыган догаларыбыз кабул булсын, - диде район башкарма комитеты җитәкчесе урынбасары Луиза Сафина.
Ләлә Сафиуллина.