Айрат Айтуганов: “Тамашачы мәхәббәтеннән көч алам»

(2 январь, “Апастово-информ”).

«Нәселебездә моңлы тавышлы, сәнгатькә гашыйк кешеләр яши. Әтием Кадыйр, әнием Кәүсәрия – Олы Болгаер ягыннан. Дәү әнием һәм әнием дә бик матур җырлыйлар. Моң чишмәсенең башы да шунда барып тоташа. Һөнәр училищесына эшкә килгәч, дустым, инде араларыбызда булмаса да, һаман күңелдә яшәүче Марсель Җамалиев булышлыгы белән җыр дөньясына кереп киттем“, – ди ул үзе.
Аннан язмыш Айрат Айтугановны район мәдәният йортына алып килә. Биредә яшь егеткә сәләтен тагын да үстерергә мөмкинлекләр туа. Алабуга мәдәният училищесын тәмамлый. Инде 18 елдан бирле сәхнә түрендә ул. Үз тырышлыгы, зәвыгы, күңелләргә үтеп керүче моңы белән тамашачы мәхәббәтен дә яулады. Уңышлары да, Мактау грамотасы, Диплом һәм Рәхмәт хатлары да бихисап. Әле күптән түгел генә “Безнең заман – Наше время” республика фестиваленең супер финалында катнашып, өченче урынга лаек булды.
Әлеге җиңүе турында язганнан соң, социаль челтәрләрдә Айрат исеменә бик матур теләкләр юлланды. Арада мактаулы исемнәр бирүне сораучылар да бар иде.
«Әлеге юлны сайлавыма үкенмим. Эшемне үз итәм. Җырларга яратам. Тамашачы мәхәббәтеннән, алкышлардан көч алам. Сәхнәгә һәрчак күтәренке кәеф белән чыгарга тырышам”, – ди Айрат.
Бүген дә ул яңа җырлар һәм зур хыяллар белән яна. Яңа елда да яңа уңышлар телибез аңа!