Район мәдәният йортында “Балкыш” (“Сияние”) фестиваленең дүртенче сайлап алу туры узды

(21 февраль, “Апастово-информ”).

Өлкәннәр бүген дә искиткеч матур чыгышлар белән килгәннәр. Шигырьләре, җыр-моңнары, биюләре, театраль күренешләре белән тамашачыны да, жюрины да әсир иттеләр. Шулай ук төрле уен коралларында оста уйнаучы өлкәннәр дә күп районда. Быел да алар бик матур көйләрен бүләк иттеләр. “Садә” вокал-анасамбленең чыгышы да игътибарга лаек булды.
“Сайлап алу турлары һәр җирлектә дә югары дәрәҗәдә узды. Өлкәннәребез быел тагын да актив булды. Үзенчәлекле, искиткеч матур чыгышлар белән истә калачак фестиваль. Шулай ук һәр зонада да халык иҗаты күргәзмәләре дә оештырылды. Күз явын алырлык, күңел җылысын кушып эшләнгән кул эшләре һәркемне җәлеп итәрлек иде”, - ди район ветераннар Советы җитәкчесе Гөлнур Насыйбуллина.
Фестивальдә һәр катнашучыга да район башкарма комитеты һәм район ветераннар Советы исеменнән Мактау грамоталары тапшырылды.