Язмыш

Балтач районында авария: машина йөртүче әни кеше үлгән, дүрт бала имгәнгән

1 июль 2025 - 09:21 Автор:

Апастово-информ

519

Башкортстанның Балтач районында Борай – Иске Балтач юлында кичә авария булган. Биредә машина йөртүче хатын-кыз һәлак, салондагы 4 бала исән калган. Бу турыда «Башинформ» хәбәр итте.

38 яшьлек хатын-кыз «Лада Гранта» машинасына 4 бала утыртып чыккан. Ул юл кырыена төшеп китеп капланган. Әни кеше «ашыгыч ярдәм» килгәнче үлгән. Аның үзенең 3 баласы, туганының баласы исән калган. Балалар – 1,5 яшьтән 11 яшькә кадәрге кызлар – имгәнгән. Аларны хастаханәгә китергәннәр.

Башкортстан сәламәтлек саклау министры Айрат Рахматуллин хәбәр иткәнчә, 4 баланы ашыгыч рәвештә Балтач хастаханәсенә китергәннәр, аннары Бөре хастаханәсенә күчергәннәр. 3 баланың хәле уртача авырлыкта, алар хастаханәдә дәвалана, 1 баланы бүген Уфага күчерәләр, диелә хәбәрдә.

_{Чыганак:https://intertat.tatar/news/baltac-raionynda-avariya-masina-iortuce-ani-kese-ulgan-durt-bala-imgangan-5873888}