Пионерия оешуга – 90 ел

Май ае Апас урта мәктәбенең 5 нче сыйныф укучылары өчен аеруча истәлекле булды. 3 май көнне алар тантаналы шартларда Татарстан варислары оешмасына керделәр. Мәктәп директоры И. Зиннәтуллин, район ветераннар Советы рәисе М. Хәкимҗанова чыгыш ясап, кыскача пионерия тарихына тукталдылар, укучыларны яхшы укырга, тәртипле булырга өндәделәр. Педогог-оештыручы Г. Сафина төрле сорау-җавап бәйгеләре оештырды. Татарстан флагын чагылдырган, аның бер өлеше булып торган галстук белән таныштырды. Соңыннан тантаналы музыка астында өлкәннәр укучыларга галстук бәйләделәр.