Кылган эшегез – үз көчегез, Якты да, мактаулы да

Россия күләмендә дә нибары 206 гаилә бүләкләнгән "Ата-ана Даны" орденының берсе үзенең иясен Апастан тапты. Россия Федерациясе Президенты В.В. Путин Указы белән әлеге орденга Татарстаннан бердәнбер гаилә - районыбызның Акхуҗа авылында гомер кичерүче Нигъмәтҗановлар лаек булды. Ил-көнгә лаек, инсафлы, укымышлы, булдыклы 8 бала тәрбияләп үстергән Наил һәм Гөлирам Нигъмәтҗановлар әлеге бүләкне 18 декабрьдә Түбән Новгород шәһәрендә булган олы тантанада РФ Президентының Идел буе Федераль округы буенча вәкаләтле вәкиле Михаил Бабич кулыннан алды.

Нигъмәтҗановларны ил күләмендә таныткан әлеге вакыйга уңаеннан аларны тәбрикләүчеләр һәм бүләкләүчеләр күп булды. ТР Министрлар кабинеты Аппаратының башкарма органнар һәм җирле үзидарәләр белән эшләү бүлеге җитәкчесе Фаил Салихов та Наил абый белән Гөлирам апаны республика җитәкчелеге исеменнән тәбрик итеп, чәчәк бәйләмнәре һәм бүләкләр тапшырды. "Барлык балаларыгызны да тәрбияләп кеше иткәнсез, укыткансыз, дөрес юл күрсәткәнсез. Сезнең ул-кызларыгыз һөнәрләренә тугры калып, үзләре алган белгечлек буенча эшлиләр. Хезмәт сөючән, тырыш ата-ана үрнәгендә үскән балалар тормышта максатларына ирешәләр", - диде республика кунагы. Шулай ук Район Советының аппарат җитәкчесе Алмаз Сабирҗанов һәм район башкарма комитеты җитәкчесе урынбасары Ранис Әхмәтшин да Нигъмәтҗановлар белән очрашып, район башлыгы Рәшид Заһидуллин исеменнән Рәхмәт хаты, ак мамык шәл һәм тере чәчәкләр бүләк иттеләр.

Наил абый белән Гөлирам апа 46 ел бергә тату, үрнәк гомер кичергәннәр. Наил абый 58 ел умартачылыкта эшләп, Татарстан Республикасының Атказанган умартачысы исеменә лаек булган, һәр ел саен районның "Иң яхшы умартачысы" булып танылган. Гөлирам апа да бер генә көн дә колхоз эшеннән калган кеше түгел. Балалары да хезмәт белән чыныгып, нык ихтыярлы, максатчан булып үскәннәр. Бүген аларның 3 уллары хәрби хезмәт кешеләре, 1 уллары юридик өлкәдә эшли. Алар инде үзләре дә дәүләт бүләкләренә лаек булганнар. Кызлары исә - югары категорияле укытучылар, яшь буынга белем һәм тәрбия бирүне максат итеп алганнар.

Нигъмәтҗановлар тырышлыкларын күргән, данлаган, мәртәбәләргә күтәргән һәр кешегә рәхмәтле. "Әгәр районның җитәкче-белгечләре бәяләмәсә, тәкъдим итмәсә, без бу шатлыклы вакыйгаларны кичермәс идек. Аларга мең рәхмәт", - диделәр алар икесе бер авыздан.