Елизавета апа Ибраһимова кульяулыклар, сөлгеләр, өстәл япмалары чигә

(27 январь, “Апастово-информ“).

“Тумышым белән мин Алабуга районы Иске Үтәгән авылыннан. Мәктәпне тәмамлагач, китапханәчеләр әзерли торган техникумда укыдым. Шул елларда республиканың төрле районнарыннан килгән кызлар белән таныштым. Алар кул эшләренә бик оста иде. Дусларымнан күреп мин дә кызыксына башладым. Хәзер дә, күзем начаррак күрсә дә, кулыма бәйләү, чигү алам. Шул шөгыль белән вакыт узганы сизелми дә. Үзең тудырган матурлыкка карап күңел үсә, сөенәсең“, – ди ул.

Елизавета апа кульяулыклар, сөлгеләр, өстәл япмалары чигә. Алар берсен-берсе кабатламаган. Барысына да күңел һәм кул җылысы салынган. Бияләү, оекбаш, башмакларны күпләп бәйләп куя һәм якыннарына өләшә.

Җиләк, төрле шифалы үләннәр җыю да Елизавета апаның яраткан шөгыле. Урманнарның җиләкле урыннарын да, сукмакларын да яхшы белә. Җәяүләп чыгып китәргә дә иренми, бер ялгызы чыгып китүдән дә курыкмый. Шул ук вакытта чиләген тутырмыйча кайтырга да ашыкмый.

42 ел дәвамында китапханәче булып эшләгән ул Елизавета апа. Бүген дә китап, газета-журналларны яратып укый. #яшәавылымминем