Чирү авылы юллы булды!

-Бу Федераль программа буенча башкарыла торган күләмле эшне тендер-конкурста “Волгодорстрой” юл төзелеше оешмасы отты. Барлык эш күләмен бу җәйдә төгәлләү бурычы куелды, сентябрь аенда яңа юлдан хәрәкәт ачылырга тиеш. Яңа төзелүче юлның гомуми озынлыгы 3 километрга якын булып, барлыгы ярты миллион кубометрлык җир казу, күчерү, өю эшләре башкарылачак. Унга якын урында күтәртелгән дамба аша су агу өчен 1-2 шәр метр диаметрлы, бик заманча гидрокорылмалар куела,-ди район башкарма комитеты җитәкчесенең инфраструктура тармагы буенча урынбасары Айрат Хәсәнов.

– Безнең күчмә автоколоннада 50 гә якын техника исәпләнә. Иртәнге җидедән кичке җидегә кадәр ике сменада эшлибез,-дип таныштырды безне үзенең бердәм коллективы белән прораб Алмаз Галәветдинов.

- Шушы үзгәрешләрне күрдем дә күңелем сөенә. Хәзер менә телефоны, интернет, газы-суы бар, урамнар да якты, шатланып яшәргә генә кала, - ди Галимә Рамазанова..

Күп еллар колхозда, авылда җаваплы хезмәт башкарган сеңелесе Рузалия Гыйззәтуллина да кушылды әңгәмәбезгә:

-Дәвешкә тимер юл күпере астыннан чыгып, шпал санап көненә унар чакрым җәяү йөргән чаклар булды. Исән-имин булып, сәламәтлектә яңа асфальт юллардан да йөрергә язсын Ходай,-ди ул.

Киң, биек итеп төзелүче яңа юлны ныклап таптаткач, аңа калын итеп, махсус ком-таш катламы җәеләчәк, киләчәктә асфальт салыначак. Шушы авылда туып-үсеп, аңа тугры калган Мөнирә Хәбибуллина, Сәкинә Саттарова, Сабирә Гайнуллина, Гөлфирә Әбүбакирова, Гөлсирә Бакирова, Мансур Хәбибуллин, Фәрит Гыйззәтуллин һәм башка бик күпләрнең олы шатлыгын без дә уртаклашабыз.